jaukjeybanner

កង​ម៉ា​រី​ន​ចិន​នឹង​ធ្វើ​សមយុទ្ធ​ក្នុង​សមុទ្រ​ចិន​ខាងត្បូង

យោង​តាម​ស៊ី​ន​ហួ​ថា នាវាចម្បាំង​៣​គ្រឿង​នៃ​កង​នាវាចរណ៍​ណា​ន​ហៃ​កាលពី​ថ្ងៃ​ទី​៤ ឧសភា បាន​ចាក​ចេញពី​កំពង់​ផែ​មួយ​នៅ​សាន​យ៉ា ខេត្ត​ហៃ​ណា​ន់​ភាគ​ខាងត្បូង​ចិន ដើម្បី​ចូលរួម​ក្នុង​សមយុទ្ធ​បែប​ប្រយុទ្ធ​មួយ​នៅ​សមុទ្រ​ចិន​ខាងត្បូង ព្រមទាំង​ក្នុង​ដែនទឹក​ជិតខាង ។

នាវា​ទាំង​៣​គ្រឿង​នេះ​គឺ នាវា​ពិឃាត​បាញ់​មី​ស៊ី​ល HEFEI នាវា​ពិឃាត​បាញ់​មី​ស៊ី​ល SANYA និង​នាវា​ផ្គត់ផ្គង់ HONGHU ។ នាវា​ទាំងនេះ​នឹង​ទៅ​ចូលរួម​នា​ពេល​ខាង​មុខ​នេះ ជាមួយ​នាវា​ពិឃាត​បាញ់​មី​ស៊ី​ល LANZHOU និង GUANGZHOU ព្រមទាំង​នាវា​ពិឃាត​បាញ់​មី​ស៊ី​ល YULIN ដែល​បច្ចុប្បន្ន​កំពុង​បំពេញបេសកកម្ម​ផ្សេង ។

ជាមួយ​ឧទ្ធម្ភាគចក្រ​៣​គ្រឿង និង​ទាហាន​ជា​ច្រើន​សិប​នាក់​នៃ​កងកម្លាំង​ពិសេស កង​នាវាចម្បាំង​ចិន​នឹង​ត្រូវ​បែងចែក​ជា​៣​ក្រុម ដែល​ធ្វើ​សកម្មភាព​ក្នុង​បណ្តា​តំបន់​នៃ​សមុទ្រ​ចិន​ខាងត្បូង មហាសមុទ្រ​ឥណ្ឌា និង​មហាសមុទ្រ​ប៉ា​ស៊ី​ហ្វិ​ក ដើម្បី​ធ្វើ​សមយុទ្ធ​ផ្សេង​ៗ ។

កង​ម៉ា​រី​ន​ចិន​នឹង​កេណ្ឌ​ប្រមូល​សម្រាប់​សមយុទ្ធ​នូវ​កងទ័ពអាកាស កងទ័ពជើងទឹក កងកម្លាំង​នៅ​លើ​កោះ​XISHA និង​កោះ NANSHA ព្រមទាំង​កងកម្លាំង​នៃ​កង​នាវា BEIHAI។

សមយុទ្ធ​នេះ​សំដៅ​ពង្រឹង​ដល់​ការ​ត្រៀមលក្ខណៈ និង​ការ​សម្របសម្រួល​គ្នា ជាក់ស្តែង​រវាង​បណ្តា​នាវាចម្បាំង និង​កង​យន្តហោះ ព្រមទាំង​កងកម្លាំង​ឯទៀត​ៗ ។

កាលពី​ចុងខែ​កក្កដា ឆ្នាំ​២០១៥ ក្រុង​ប៉េ​កាំ​ង​បាន​បញ្ជូន​ទៅ​កាន់​សមុទ្រ​ចិន​ខាងត្បូង​នូវ​នាវាចម្បាំង​ ជាង​១០០​គ្រឿង ព្រមទាំង​នាវា​ផ្ទុក​យន្តហោះ​ទៅ​ចូលរួម​ក្នុង​សមយុទ្ធ​កង​នាវាចរណ៍​នៅ ៕

លោក JOHN KASICH ដកថយ​សល់​លោក TRUMP ម្នាក់ឯង

លោក  JOHN  KASICH ជា​គូប្រជែង​សល់​ម្នាក់​គត់​របស់​លោក  DONALD TRUMP ក្នុង​ការ​បោះ​ឆ្នោត​សម្រាំង​បេក្ខជន​ប្រធានាធិបតី​នៃ​គណបក្ស​សាធារណរដ្ឋ ឥឡូវ​លោក​សម្រេច​ដកខ្លួន​ថយ​ហើយ​សល់​លោក TRUMP តែ​ម្នាក់ឯង​ដែល​ពិត​ណាស់​នឹង​ប៉ះ​គ្នា​ជាមួយ​លោកស្រី​ហ៊ី​ល​ឡា​រី គ្លី​ន​តុ​ន ក្នុង​ការ​បោះ​ឆ្នោត​ប្រធានាធិបតី​អា​មេ​រិ​ក​នា​ចុងឆ្នាំ​នេះ។

មុន​នេះ​លោក  TED CRUZ គូប្រជែង​ខ្លាំង​របស់​លោក  TRUMP ប្រកាស​ដកខ្លួន​ថយ ក្រោយ​ទទួល​បរាជ័យ​នៅ​រដ្ឋ​អីុ​ន​ឌី​យ៉ា​ណា ។ ដូច្នេះ​លោក TRUMP  សល់​ជា​បេក្ខជន​ចុង​ក្រោយ ក៏​ប៉ុន្តែ​ត្រូវ​រង់ចាំ​រហូត​ដល់​អនុសញ្ញា​របស់​គណបក្ស​សាធារណរដ្ឋ​នា​ ខែកក្កដា​ខាង​មុខ​នេះ ដើម្បី​អាច​ក្លាយជា​បេក្ខជន​ប្រធានាធិបតី​ផ្លូវការ ៕

នាវិក​ឥណ្ឌូ​នេ​ស៊ី​ថា ​ក្រុម​អា​ប៊ូ​សា​យ៉ា​ហ្វ​គំរាម​កាត់​ក្បាល​មុន​ពេល​ដោះ​លែង

រដ្ឋធានី​ហ្សា​កា​តា  ៖ នាវិក​ឥ​ណ្ដូ​នេ​ស៊ី​ម្នាក់​បាន​និយាយ​កាលពី​ថ្ងៃ​ទី​០២ ឧសភា​ម្សិលមិញ​ថា ពួក​សកម្មប្រយុទ្ធ​អីុ​ស្លា​ម​អា​ប៊ូ​សា​យ៉ា​ហ្វ​របស់​ប្រទេស​ហ្វី​លី​ពី​ន បាន​គំរាម​សម្លាប់​ដោយ​វះ​ទម្លុះ​បំពង់ក​របស់​គាត់ ពេល​ចាប់ជំរិត​ភ្លាម​ៗ ពោល​គឺ មួយ​ថ្ងៃ មុន​ពេល​លោក​និង​សមាជិក​នាវិក​ចំនួន​ប្រាំបួន​នាក់​ផ្សេង​ទៀត ត្រូវ​បាន​ដោះ​លែង​។

សមាជិក​នាវិក​, លោក ជូ​លៀន ភី​លី​ព ពណ៌នា​ពី​របៀប​ដែល​ពួក​គេ​ត្រូវ​បាន​ចាប់​ធ្វើ​ជា​ចំណាប់ខ្មាំង​ដោយ​ក្រុម​ សកម្មប្រយុទ្ធ​ចំនួន​៨​នាក់​ក្លែង​ឯកសណ្ឋាន​ជា​ប៉ូលិស​ហ្វី​លី​ពី​ន ដោយ​ជិះ នាវា​សណ្ដោង​មួយ​ធ្វើ​សកម្មភាព​ត្រួតពិនិត្យ​ក្រុម​នាវិក​របស់​ខ្លួន រួច​វាប់​ចង​ជា​ចំណាប់ខ្មាំង​តែ​ម្តង​។

ទោះជា​យ៉ាងណា​ក៏​ដោយ លោក​ភី​លី​ព​បាន​បន្ថែម​ទៀត​ថា ពួក​សកម្មប្រយុទ្ធ​អ៊ី​ស្លា​ម​និយម​របស់​ហ្វី​លី​ពី​ន មិន​បាន​ប៉ះពាល់​រៀង​កាយ​និង​អាយុជីវិត​ចំណាប់ខ្មាំង​ទាំង​១០​នាក់​នោះ​ទេ ដោយ​គ្រាន់តែ​ចាប់​ដើម្បី​ជំរិត​ទារប្រាក់​ប៉ុណ្ណោះ ៕

ទីក្រុង​កា​ណា​ដា​មួយ​ឡោម​ព័ទ្ធ​ដោយ​ភ្លើង​ឆេះ​ព្រៃ​ជម្លៀស​ប្រជាជន​ចេញ​អស់

សភាពការណ៍​នៃ​ភ្លើង​ឆេះ​ព្រៃ​មើលទៅ​ដូច​ជា​ឆាក​មួយ​នៃ​ខ្សែភាពយន្ត​គ្រោះ​មហន្តរាយ​ដូច្នេះ​ដែរ ។

ទីក្រុង FORT MCMURRAY នៅ ALBERTA ភាគ​ខាងលិច​កា​ណា​ដា​ត្រូវ​រង​គ្រោះ​ដោយ​ភ្លើង​ឆេះ​ព្រៃ​យ៉ាង​ខ្លាំងក្លា ដែល​បង្ខំ​ឱ្យ​អាជ្ញាធរ​ជម្លៀស​ប្រជាជន​ចេញ​៨០.០០០​នាក់ ក្នុង​ចំណោម​ប្រជាជន​ទាំង​១០០.០០០​នាក់​នៃ​ទីក្រុង​នេះ ។

ទីក្រុង​ប្រេងកាត​នេះ​ទាំងមូល​រាតត្បាត​ដោយ​ផ្សែង​ខ្មៅ​យ៉ាង​ក្រាស់​ ចាប់តាំងពី​ថ្ងៃ​ទី​៣ ឧសភា មក ហើយ​ភ្លើង​នៅ​ភាគ​ខាងជើង​ក្រុង​កំពុង​ឆេះ​រាលដាល​យ៉ាង​រហ័ស​បំផុត ។

ផ្នែក​ប្រកាស​អាសន្ន​នៃ​ខេត្ត ALBERTA គូសបញ្ជាក់​ថា ទីក្រុង FORT MCMURRAY ស្ថិត​ក្រោម​បញ្ជា​ឱ្យ​ជម្លៀស​មនុស្ស​ចេញ​ជា​ការ​ចាំបាច់ លើកលែងតែ​នៅ​ឧទ្យាន​ជិត​ទន្លេ​ភាគ​កណ្តាល​ក្រុង ព្រមទាំង​តំបន់​ចុង​ខាងត្បូង​ជុំវិញ​ព្រ​លាន​យន្តហោះ ។

រូបភាព​នៃ​ការ​ជម្លៀស​មនុស្ស​ចេញ​យ៉ាងច្រើន​បែប​នេះ​ពិតជា​គួរ​ឱ្យ​ ភ្ញាក់ផ្អើល​ខ្លាំង ។ ខ្សែ​រថយន្ត​យ៉ាង​វែង​ឃើញ​បន្តកន្ទុយ​គ្នា​តាម​ផ្លូវថ្នល់​ទៅ​កាន់​បណ្តា​ មជ្ឈមណ្ឌល​ទទួល​ដែល​បង្កើត​ឡើងជា​ពិសេស ។ រូបភាព​ទូរទស្សន៍​បង្ហាញ​បណ្តា​រថយន្ត​រត់​កណ្តាល​ថ្នល់ ដែល​ច​ញ្ចើ​ម​ថ្នល់​រាតត្បាត​ដោយ​អណ្តាតភ្លើង ។ បណ្តាសារ​ព័ត៌មាន​ក្នុងស្រុក​អះអាង​ថា បណ្តា​ស្ថានីយ​ចាក់​ប្រេង​នៃ​ទីក្រុង​នេះ​ត្រូវ​ផ្ទុះ​ឆេះ រួច​ប្រជាជន​ជា​ច្រើន​រង​ការ​រលាកភ្លើង​រួច​ហើយ ។ ម្យ៉ាងទៀត ឧទ្យាន​ធំ​មួយ​សម្រាប់​ជា​កន្លែង​ចត​រថយន្ត​ត្រូវ​ភ្លើង​ឆេះ​ខ្ទេច​ទៅ​ជា​ ផេះ ។ ទីក្រុង​នេះ​មាន​ពលករ​ខាង​ផ្នែក​ប្រេងកាត​រស់នៅ​ច្រើន​រួច​ក៏​មាន​រថយន្ត​ ច្រើន​ដែរ ។

នាយក​រដ្ឋមន្ត្រី​កា​ណា​ដា លោក JUSTIN TRUDEAU គូសបញ្ជាក់​ថា លោក​អំពាវនាវ​ស្នើ​សុំ​ជំនួយ ។ លោក​មាន​ប្រសាសន៍​ថា សូម​ឱ្យ​ប្រជាជន​ក្រុង FORT MCMURRAY ប្រុង​ប្រយ័ត្ន ហើយ​ធ្វើ​តាម​បទបញ្ជា​ឱ្យ​ជម្លៀស​ចេញ ៕

ចិន​បន្ត​បើកទ្វារ​ទំនប់​ទម្លាក់​ទឹក​មក​ទន្លេមេគង្គ

យោង​តាម​ទីភ្នាក់ងារ​ព័ត៌មាន​វៀតណាម VNA ថា ប្រទេស​ចិន​បាន​បង្កើន​ទំហំ​ទឹក​ទម្លាក់​ពី​ទំនប់​វា​រី​អគ្គិសនី JONGHONG ស្ថិត​ក្នុង​ខេត្ត​យុន​ណា​ន់​ឆ្ពោះ​មក​កាន់​ទន្លេមេគង្គ​ខាងក្រោម ។

ថ្ងៃ​ទី​២១ មេ​សា ទឹក​ដែល​មាន​ទំហំ​១.៥០០​ម៉ែត្រគូប ក្នុង​មួយ​វិនាទី ត្រូវ​បាន​បើក​ទម្លាក់ ហើយ​ប្រតិបត្តិការ​នេះ​នឹង​មាន​រហូត​ដល់​ថ្ងៃ​ទី​៣១ ឧសភា ។

ព័ត៌មាន​នេះ​ត្រូវ​បាន​ប្រកាស​ដោយ​រដ្ឋមន្ត្រី កសិកម្ម និង​អភិវឌ្ឍន៍ជនបទ​វៀតណាម លោក CAO DUC PHAT ក្នុង​ឱកាស​នៃ​កិច្ចប្រជុំ​មួយ​កាលពី​ថ្ងៃ​ទី​២៦ មេ​សា នៅ​ក្រុង​ហាណូយ ដើម្បី​ស្នើ​សុំ​ការ​ជួយ​ទ្រទ្រង់​សំដៅ​អនុវត្ត​ផែនការ​ធ្វើ​អន្តរាគមន៍​ បន្ទាន់​សម្រាប់​ទប់ទល់​នឹង​គ្រោះ​រាំង​ស្ងួត និង​ការ​ជ្រាប ឬ​ហូរ​ចូល​នៃ​ទឹកប្រៃ ។

លោក CAO DUC PHAT ថ្លែង​ថា កម្ពស់​ទឹកទន្លេ​មេគង្គ​បាន​កើនឡើង​ក្នុង​ពាក់កណ្តាល​ដំបូង​នៃ​ខែមេសា ដែល​អាច​ជួយ​កាត់​បន្ថយ​ការ​ជ្រាប​ចូល ឬ​ហូរ​ចូល​នៃ​ទឹកប្រៃ ។ ក៏​ប៉ុន្តែ​កម្ពស់​ទឹកបាន​ស្រក​ចុះ​វិញ​យ៉ាង​ឆាប់​ជាមួយ​ការ​វិល​ត្រឡប់ និង​ការ​ហូរ​ចូល​វិញ​នៃ​ទឹកសមុទ្រ​នៅ​តំបន់​ដីសណ្ត​ទន្លេមេគង្គ ។

ការ​ទម្លាក់​ថ្មី​នៃ​ទឹក​ទំនប់​នឹង​រួមចំណែក​សម្រាល​សភាពការណ៍​ក្នុង​ តំបន់​មួយ​ចំនួន​នៃ​ដីសណ្ត​ទន្លេមេគង្គ ។ ទឹក​ដែល​ទម្លាក់​មក​នឹង​មក​ដល់​វៀតណាម រយៈពេល​ពី​១៨​ទៅ​២០​ថ្ងៃ ។

តាម​សំណើ​របស់​បណ្តា​ប្រទេស​នៅ​ជាប់​ទន្លេមេគង្គ​ប្រទេស​ចិន​បាន​បើក​ ទម្លាក់​ទឹក ពី​ថ្ងៃ​ទី​១៥ មក​១០ មេ​សា ពី​ទំនប់​នៃ​មជ្ឈមណ្ឌល​វា​រី​អគ្គិសនី JINGHONG ជាមួយ​ទំហំ​ទឹក​២.១៩០​ម៉ែត្រគូប​ក្នុង​មួយ​វិនាទី ។

គ្រោះ​រាំង​ស្ងួត និង​ការ​ជ្រាប ឬ​ហូរ​ចូល​នៃ​ទឹកប្រៃ​ក្នុង​តំបន់​ដីសណ្ត​ទន្លេមេគង្គ​ឈាន​ដល់​កម្រិត​កំពូល ​ពុំ​ធ្លាប់​មាន​ចាប់តាំងពី​៩០​ឆ្នាំ​មក​ហើយ នៅ​វៀតណាម​ញ៉ាំង​ឱ្យ​មានការ​ព្រួយបារម្ភ​របស់​កសិករ​ជា​ច្រើន​លាន​នាក់​នៃ​ តំបន់​មាន​ជីវជាតិ​នេះ ។ មក​ទល់​ពេល​នេះ​ទីក្រុង និង​ខេត្ត​ដល់​ទៅ​២០​នៅ​តំបន់​ដីសណ្ត​ទន្លេមេគង្គ​ប្រឈម​មុខ​នឹង​គ្រោះ​រាំង ​ស្ងួត និង​ការ​ជ្រាប ឬ​ហូរ​ចូល​នៃ​ទឹកប្រៃ​ញ៉ាំង​ឱ្យ​មានការ​ខូចខាត​ដីស្រែ​១៦០.០០០​ហិ​កតា ៕

អត្ថបទផ្សេងៗ

ថ្ងៃនេះ
ម្សិលមិញ
សរុប
593
923
4540331