jaukjeybanner

វិនិយោគិន​មក​ពី​ អ៊ីតាលី​ មាន​បំណង​នាំ​ចេញ​ដំឡូង​ពី​កម្ពុជា

កសិករកំពុងប្រមូលផលដំឡូងមី​នៅ​ចំការ​មួយ ក្នុង​ខេត្ត ត្បូងឃ្មុំ កាល​ពី​ខែ​មុន។

ភ្នំពេញៈ ក្រុម​វិនិយោគិន​មកពី​ប្រទេស កូឌឺវ័រ និង​អ៊ីតាលី​កាលពី​ថ្ងៃ​ចន្ទ​បាន​ពិភាក្សា​ជាមួយ​ក្រុមហ៊ុន​ ម៉ុង ឫទ្ធី គ្រុប​សម្រាប់​ភាព​ជា​ដៃគូ​ដើម្បី​កែច្នៃ​ដំឡូងមី (សម្រាប់​ជា​អាហារ) និង​នាំ​ចេញ​ទៅ​ទីផ្សារ​អ៊ីតាលី អេស៉្បាញ និង​បារាំង​។ នេះ​បើ​តាម​លោក ម៉ុង ឫទ្ធី​ ។

លោក​ថ្លែង​ថា​ក្រុម​វិនិយោគិន​បាន​បង្ហាញ​ចំណាប់​អារម្មណ៍​ខ្លាំង​​ក្នុង ​ការ​នាំ​ចេញ​ដំឡូងមី​ទៅ​ទីផ្សារ​អឺរ៉ុប​ហើយ​ពួកគេ​ត្រូវការ​វា​ជា​បន្ទាន់​ ។

ទោះបី​ជា​អនុស្សរណៈ​នៃ​ការ​យោគយល់​​ (MoU) ​មិន​ទាន់​ត្រូវ​បាន​​ធ្វើ​ឡើង​ក៏ដោយ​លោក ឫទ្ធី អះអាង​ថា​​ផែនការ​នេះ​ទំនង​ជា​នឹង​កើតឡើង​ក្នុង​ពេល​ឆាប់ៗ ​។

យោង​តាម​លោក ម៉ុង ឫទ្ធី គេ​ត្រូវការ​ពេលវេលា​ដោយសារ​តែ​ដាំ​ដំឡូងមី​ភាគច្រើន​ប្រជាជន​ដាំ​នៅ​តាម​ ផ្ទះ​សម្រាប់​បរិភោគ​ហើយ​ក្រុមហ៊ុន​នឹង​សិក្សា​ពី​ប្រភេទ​ពូជ​ដែល​ពួកគេ​ កំពុង​ស្វែងរក​ផង​ដែរ​។ លោក​បន្ត​ថា​៖ «​វា​ជា​លទ្ធផល​វិជ្ជមាន​ខ្លាំង​ណាស់​។ ពួកគេ​ពិត​ជា​ចង់​វិនិយោគ​លើ​ដំឡូង​ប៉ុន្តែ​យើង​ចង់​ស្រាវជ្រាវ​ប្រភព​​ ផ្គត់ផ្គង់​តម្រូវការ​របស់​ពួកគេ​ជា​មុន​សិន​ដោយសារ​តែ​កសិករ​ភាគច្រើន​ មិនមែន​ដំឡូងមី​ហូប​ទេ»​។ ​

លោក​បន្ថែម​ថា​៖ «​សម្រាប់​ដំណាក់កាល​ដំបូង​ពួកគេ​ត្រូវការ​ ១០ ​កុងតឺន័រ ឬ​ច្រើន​ជាង​នេះ​ក្នុង​មួយ​​ខែ​។ តម្រូវការ​របស់​ពួកគេ​គឺ​ធំ​»​។ លោក​បញ្ជាក់​ថា​ក្រុម​វិនិយោគិន​ចង់​ឲ្យ​លោក​ធ្វើ​ជា​ដៃគូ​លើ​ផែនការ​ វិនិយោគ​នេះ។

លោក​​បាន​​ថ្លែង​ថា​៖ «​ខ្ញុំ​ត្រូវ​តែ​ធ្វើ​វា​។ វា​​មិន​ពិបាក​ទេ​ប៉ុន្តែ​យើង​ត្រូវ​តែ​ដឹង​ទីកន្លែង​ក្នុង​ការ​ប្រមូល​»​។ លោក​បន្ត​ថា​៖ «​បន្ទាប់​មក​យើង​នឹង​ប្រមូល​វា​ពី​កសិករ​ កែច្នៃ​វា​រួច​វេចខ្ចប់​ទៅ​ទីផ្សារ​របស់​ប្រទេស​អ៊ីតាលី​។ វា​ធ្វើ​ជា​អាហារ​។ ខ្ញុំ​នឹង​ធ្វើ​វា​សម្រាប់​ទីផ្សារ​របស់​កសិករ​»​។

កម្ពុជា​បាន​នាំ​ចេញ​ម្សៅ​ដំឡូងមី​ប្រហែល​ ២៧ ០៣៤ ​តោន​ទៅ​ប្រទេស​ចិន ១៥៣ តោន​ទៅ​ប្រទេស​កូរ៉េ​ខាង​ត្បូង ១០២ ​តោន​ទៅ​អាមេរិក​៕

Boeing និង Tata សហការ​ផលិត​គ្រឿង​យន្ត​ហោះ

ឧទ្ធម្ភាគចក្រ AH-64E Apache ក្នុង​ពិព័រណ៍​នា​ទីក្រុង​ឌូបៃ។

ក្រុង​ម៉ុមបៃៈ ក្រុមហ៊ុន​ផលិត​យន្តហោះ​ Boeing Co និង​ក្រុមហ៊ុន​ Tata Advanced Systems Ltd នឹង​សហការ​គ្នា​ផលិត​គ្រឿង​បន្លាស់​យន្តហោះ​នៅ​ប្រទេស​ឥណ្ឌា ដែល​ជា​កិច្ច​សហប្រតិបត្តិ​ការ​មួយ ដែល​នឹង​ជំរុញ​ដល់​ផែនការ​របស់​លោក​នាយក​រដ្ឋ​មន្ត្រី​ឥណ្ឌា Narendra Modi ក្នុង​ការ​ជំរុញ​វិស័យ​ផលិតកម្ម​ក្នុង​ស្រុក​ ក្រោម​កម្មវិធី «ផលិត​នៅ​ប្រទេស​ឥណ្ឌា» ​របស់​លោក។

ការ​សម្រេច​របស់​ក្រុមហ៊ុន​ Boeing ក្នុង​ការ​បង្កើត​មជ្ឈមណ្ឌល​ផលិតកម្ម​មួយ​នៅ​ប្រទេស​ឥណ្ឌា​ ដែល​ត្រូវ​បាន​ប្រកាស​កាល​ពីថ្ងៃ​ចន្ទ បាន​ធ្វើឡើង​មួយ​ឆ្នាំ​​បន្ទាប់​ពី​ក្រុម​ហ៊ុន​ដែល​មាន​មូលដ្ឋាន​នៅ​រដ្ឋ​ ឈីកាហ្គោ​​នេះ​បាន​ឲ្យ​ដឹង​ថា ក្រុមហ៊ុន​របស់​ខ្លួន​កំពុង​​ដំណើរ​ការ​ស្វែង​យល់​ពី​ដៃគូ​សម្រាប់​ទំនាក់​ ទំនង​ជា​យុទ្ធសាស្រ្ត ​និង​ប្រកប​ដោយ​ខ្លឹម​សារ​ ក្រោយ​ពេល​ដែល លោក​ Modi បាន​បន្ធូរ​បន្ថយ​ច្បាប់​សម្រាប់​ការ​វិនិយោគ​បរទេស​នៅ​ក្នុង​វិស័យ​ការ​ពារ ​ជាតិ​នៅ​ប្រទេស​ឥណ្ឌា។

ក្រុមហ៊ុន​ទាំង​ពីរ​បាន​ឲ្យ​ដឹង​ក្នុង​សេចក្តី ថ្លែង​ការណ៍​មួយ​ថា ជាបឋម​ក្រុមហ៊ុន​ Boeing ដែល​ជា​ក្រុមហ៊ុន​ផលិត​យន្ត​ហោះ​ធំ​ជាង​គេ​របស់​ពិភពលោក និង​ក្រុម​ហ៊ុន​ Tata Advanced Systems នឹង​ផលិត​គ្រោង​ឧទ្ធម្ភាគចក្រ​ម៉ូដែល AH-64 Apache ជា​មុន​សិន បន្ទាប់​មក នឹង​ប្រកួត​ប្រជែង​ដណ្តើម​យក​កិច្ច​សន្យា​ផ្នែក​ការពារ​ជាតិ និង​អាកាស​ចរណ៍​ស៊ីវិល​ផ្សេង​ទៀត។ ​ប៉ុន្តែ ក្រុម​ហ៊ុន​ទាំង​ពីរ​ពុំ​បាន​ផ្តល់​ព័ត៌មាន​លម្អិត​អំពី​ក្រុមហ៊ុន​បណ្តាក់​ ទុន​រួម​គ្នា​នេះ​ទេ។

លោក Pratyush Kumar ប្រធាន ក្រុមហ៊ុន​ Boeing's India បាន​ឲ្យ​ដឹង​ក្នុង​សេចក្តី​ថ្លែង​ការណ៍​មួយ​ថា៖ «​ក្នុង​រយៈ​ពេល​១២​ខែ​ចុង​ក្រោយ​នេះ យើង​បាន​បង្កើន​ប្រភព​របស់​យើង​ទ្វេ​ដង​ពី​ប្រទេស​ឥណ្ឌា ហើយ​ប្តេជ្ញា​ចិត្ត​បន្ត​ធ្វើ​ដំណើរ​ទៅ​មុខ​ទៀត​»។ លោក​មាន​ប្រសាសន៍​ថា៖ «​ក្រុមហ៊ុន​បណ្តាក់​ទុន​រួម​គ្នា​នេះ គឺ​ជា​ឧទាហរណ៍​ច្បាស់​មួយ​ពី​ការ​ប្តេជ្ញា​ចិត្ត​ក្នុង​រយៈ​ពេល​វែង​របស់​ ក្រុមហ៊ុន​ Boeing ចំពោះ​កម្មវិធី «​ផលិត​នៅ​ឥណ្ឌា​» នេះ»។

បន្ទាប់​ពី​បាន​ឡើង​កាន់​តំណែង​កាល​ពី​ខែ ឧសភា ឆ្នាំ​២០១៤​ លោក Modi បាន​ប្រកាស​ពី​កម្មវិធី​ជំរុញ​របស់​លោក​ដើម្បី​លើក​កម្ពស់​វិស័យ​ផលិតកម្ម ដល់​២៥​ភាគ​រយ​នៃ​កំណើន​ផ.ស.ស របស់​ឥណ្ឌា​នៅ​ឆ្នាំ ២០២០​ ធៀប​នឹង​ទំហំ ១៨​ភាគរយ​នា​ពេល​បច្ចុប្បន្ន៕

ការ​នាំ​ចេញ​កៅស៊ូ​ធ្លាក់​ចុះ ១៨% ឆមាស ទី១

ភ្នំពេញៈ ការ​នាំ​ចេញ​កៅ​ស៊ូ​របស់​ក្រុម​ហ៊ុន​ឯកជន​ដែល​មិន​មែន​ជា​គម្រោង​វិនិយោគ​លើ ​ដី​សម្បទាន​សេដ្ឋកិច្ច​របស់​រដ្ឋ​សម្រេច​បាន ៧ ៥៨៩ តោន​នៅ​ក្នុង​ឆមាស​ទី​មួយ​ឆ្នាំ​នេះ។

ចំនួន​នេះ​បាន​ធ្លាក់​ចុះ ១៨ ភាគរយ​បើ​ធៀប​រយៈ​ពេល​ដូច​គ្នា​ពី​ឆ្នាំ​មុន​ដោយ​សារ​តម្រូវ​ការ និង​តម្លៃ​កៅ​ស៊ូ​នៅ​លើ​ទីផ្សារ​អន្តរជាតិ​ធ្លាក់​ចុះ​ខ្លាំង។

ទិន្នន័យ​ពី​ក្រសួង​កសិកម្ម រុក្ខា​ប្រម៉ាញ់ និង​នេសាទ បាន​បង្ហាញ​ថា កម្ពុជា​មាន​ក្រុម​ហ៊ុន​ចម្ការ​កៅស៊ូ​ឯកជន​សម្រាប់​ផលិត​នាំ​ចេញ ៨ ក្រុម​ហ៊ុន ហើយ​គិត​ចាប់​ពី ខែ​មករា ដល់ មិថុនា ឆ្នាំ​នេះ ក្រុម​ហ៊ុន​ទាំង​នោះ​អាច​នាំ​ចេញ​កៅស៊ូ​បាន ៧ ៥៨៩ តោន​ដែល​ធ្លាក់​ចុះ​ពី ៩ ៣៣០ តោន កាល​ពី​រយៈ​ពេល​ដូច​គ្នា ឆ្នាំ​២០១៣។

លោក លឹម ហេង អគ្គ​នាយក​រង​ក្រុម​ហ៊ុន អាន ម៉ាឌី គ្រុប ដែល​មាន​ផ្ទៃ​ដី​ប្រមូល​ផល​កៅស៊ូ​សរុប ៤ ៣១២ ហិកតា​បាន​ប្រាប់ ភ្នំពេញ ប៉ុស្តិ៍ ថា ការ​ធ្លាក់​ចុះ​បរិមាណ​នាំ​ចេញ​កៅស៊ូ​នៅ​ដើម​ឆ្នាំ​នេះ​គឺ​ដោយ​សារ​តម្លៃ​ កៅស៊ូ​នៅ​លើ​ទីផ្សារ​អន្តរជាតិ​ធ្លាក់​ចុះ​ខ្លាំង​ធ្វើ​ឲ្យ​ក្រុម​ហ៊ុន​មួយ​ ចំនួន​សម្រេច​ពន្យារ​ការ​ផលិត​និង​ពន្យារ​ពេល​នាំ​ចេញ។

លោក​បន្ត​ថា៖ «ក្រុម​ហ៊ុន​ធំៗ​មួយ​ចំនួន​គេ​ស្តុក​ទុក​អត់​ទាន់​លក់។ សូម្បី​តែ​ចម្ការ​កៅស៊ូ​ជា​លក្ខណៈ​គ្រួសារ​មួយ​ចំនួន​គេ​ផ្អាក​ចៀរ​ជ័រ​ ព្រោះ​ថា បើ​ធ្វើ​ទៅ​វា​អត់​រួច​ខ្លួន»។

លោក​បន្ត​ថា កាល​ពី​ដើម​ឆ្នាំ​មុនៗ តម្លៃ​កៅស៊ូ​អាច​លក់​បាន​ចន្លោះ​ពី ២ ០០០ ដុល្លារ ទៅ ៣ ០០០ ដុល្លារ​ក្នុង​មួយ​តោន​តែ​តម្លៃ​នៅ​ដើម​ឆ្នាំ​នេះ​បាន​ធ្លាក់​មក​នៅ​ត្រឹម​ រង្វង់ ១ ៦០០ ដុល្លារ​ប៉ុណ្ណោះ​ក្នុង​មួយ​តោន។ តម្លៃ​កៅស៊ូ​បាន​កើន​ឡើង​ខ្លាំង​ដល់​រង្វង់ ៣ ០០០ ដុល្លារ​ក្នុង​មួយ​តោន​ពី​ចន្លោះ ឆ្នាំ​២០១១ ដល់​ដើម ឆ្នាំ​២០១៣។

ទិន្នន័យ​ពី​ក្រសួង​កសិកម្ម​បាន​បង្ហាញ​ថា ផ្ទៃ​ដី​ដាំ​ដុះ​សរុប​សម្រាប់​ដំណាំ​កៅស៊ូ​ជា​លក្ខណៈ​គ្រួសារ និង​ជា​លក្ខណៈ​ក្រុម​ហ៊ុន​ឯកជន​បាន​កើន​ដល់ ៨៤ ៩០២ ហិកតា ខណៈ​ដំណាំ​កៅស៊ូ​ដែល​ដាំ​ដុះ​លើ​គម្រោង​វិនិយោគ​លើ​សម្បទាន​ដី​សេដ្ឋកិច្ច​ មាន ១៣៥ ៤៤៦ ហិកតា។ ផ្ទៃ​ដី​ដែល​ដាំ​ដុះ​លើ​ដី​សម្បទាន​ទើប​តែ​អាច​ប្រមូល​ផល​បាន​តិច​តួច​ ប៉ុណ្ណោះ។

លោក លី ផល្លា អគ្គ​នាយក​នៃ​នាយកដ្ឋាន​កៅស៊ូ​នៃ​ក្រសួង​កសិកម្ម អះអាង​ថា បញ្ហា​ការ​ធ្លាក់​ចុះ​តម្លៃ​កៅស៊ូ​គឺ​អាស្រ័យ​លើ​ទីផ្សារ​អន្តរជាតិ ដូច្នេះ​លទ្ធភាព​របស់​រដ្ឋ​ក្នុង​ការ​រក្សា​ស្ថិរភាព​តម្លៃ​គឺជា​ការ​លំបាក។

លោក​បន្ត​ថា រដ្ឋាភិបាល​មិន​ទាន់​មាន​គម្រោង​ធ្វើ​ឧបត្ថម្ភធន​ដល់​កសិករ​កៅស៊ូ​ទេ តែ​អាច​នឹង​បង្កើត​គោល​នយោបាយ​លើក​ទឹក​ចិត្ត​ផ្សេងៗ​ដើម្បី​ជួយ​សម្រួល​ដល់​ កសិករ​ដាំ​កៅស៊ូ។

លោក​ថ្លែង​ថា៖ «ឥឡូវ​ខ្ញុំ​កំពុង​គិត​ថា ធ្វើ​យ៉ាង​ណា​សុំ​ទៅ​រដ្ឋាភិបាល​ដើម្បី​ជួយ​ដល់​កសិករ។ ប្រហែល​ជា​អាច​កាត់​បន្ថយ​ពន្ធ​នានា​ដើម្បី​ជួយ​សម្រួល​ដល់​កសិករ»។

កសិករ អ៊ុល គន្ធី អាយុ ៤០​ឆ្នាំ ជា​ម្ចាស់​ចំការ​កៅស៊ូ​ដែល​មាន​ផ្ទៃ​ដី ៦ ហិកតា នៅ ខេត្ត​ត្បូងឃ្មុំ បាន​ឲ្យ​ដឹង​ថា តម្លៃ​កៅស៊ូ​នៅ​ឆ្នាំ​នេះ​បាន​ធ្លាក់​ចុះ​យ៉ាង​ខ្លាំង​បើ​ធៀប​នឹង​តម្លៃ​ ក្នុង​រយៈ​ពេល​បី​ទៅ​បួន​ឆ្នាំ​ចុង​ក្រោយ​នេះ។

លោក​ថ្លែង​ថា៖ «យើង​បារម្ភ​ណាស់ យើង​ចង់​ឲ្យ​រដ្ឋ​ជួយ​ធ្វើ​ឲ្យ​តម្លៃ​កៅស៊ូ​នៅ​លើ​ទីផ្សារ​នៅ​ថេរ ព្រោះ​ខាង​បច្ចេកទេស​យើង​អាច​ធ្វើ​បាន»៕


កម្មករ​កំពុង​ចៀរ​ជ័រ​កៅស៊ូ​នៅ​ក្នុង​ចម្ការ​ក្រុម​ហ៊ុន​ឯកជន​មួយ​នៅ ខេត្ត​កំពង់ចាម នា​ពេល​កន្លង​មក

 

កសិដ្ឋានចិញ្ចឹមបង្កង ៣កន្លែងនៅត្រូវបើដំណើរ ការនៅសីហា

តាកែវ៖ កសិកដ្ឋានចិញ្ចឹមបង្កងបី កន្លែងនៅខេត្តតាកែវ ដែលជាការជួយជ្រោមជ្រែង ពីអង្គការ JICA របស់ ជប៉ុន នឹងបើដំណើរការ នៅខែសីហា ឆ្នាំ២០១៤ ខាងមុខនេះ ។

កសិដ្ឋានចិញ្ចឹមបង្កង ត្រូវបានប្រើប្រាស់បច្ចេកវិទ្យា របស់ជប៉ុន តាមរយៈការបង្កើត ទន្លេសិប្បនិម្មិត ដែលប្រើ ប្រាស់ទឹកសាប លាយជាមួយនឹងអំបិល រួមជាមួយសារធាតុ សូដ្យូម ប៉ូតាស្យូម និង កាល់ស្យូម ក្នុងបរិមាណ មួយ ហៅថា «ទឹកទី៣ ឬ Third Water»។ នេះបើយោងតាមការចុះ ផ្សាយរបស់គេហទំព័រ Far Eastern Agriculture ចុះផ្សាយកាលពីថ្ងៃទី២៦ ឧសភា ។

អាន​បន្ត៖ កសិដ្ឋានចិញ្ចឹមបង្កង ៣កន្លែងនៅត្រូវបើដំណើរ ការនៅសីហា

អត្ថបទផ្សេងៗ

ថ្ងៃនេះ
ម្សិលមិញ
សរុប
1841
2594
4647676